ارسل    اطبع

البوم الصور و الفيديو

اثار فيلمها الكثير من الجدل رغم انه حالة سينمائية خاصة جداً تحمل توقيع وحيد حامد ويسرى نصر الله ، الاثنان اساتذة كبار أما البطلة فهى الجميلة السندريللا منى زكى ، التى انشغل كثيرون بالهجوم عليها قبل ان يشاهدوا الفيلم ، ولو فعلوا لخرجوا وقدموا لها الشكر وارسلوا لها اجمل صحبة ورد تحية وتقدير لها على دورها الجميل

كانت منى ضيفة على برنامج 90 دقيقة لتتحدث عن فيلمها الجديد : احكى ياشهر زاد

**بدأ معتز بالسؤال عن نقد الفيلم بعد نزوله ؟
قالت منى : النقد بدأ من قبل نزول الفيلم واحنا بقينا مجتمع بيحاكم بعضه وبيدى احكام مسبقة على الاخرين وكأنه صح والاخرين هم الخطأ كله ، وهذا ما شجعنى على فكرة الفيلم وانا كنت مؤمنة جدا باللى قدمته فى الفيلم وهو مش بس بيتكلم عن قهر المرأة ولكن عن قهر الرجل ايضا وبيتناقش فيه انسانية البنى آدم
اضافت منى : عجبنى فى هبة بطلة الفيلم انها بنى ادم قدرت تغير طريقة تقديمها للبرنامج من التعامل مع السياسيين ورموز من المجتمع وبدأت تتعامل مع بسطاء واتغيرت
**وعن استعدادها للدور قالت : كنا بنعمل فى بيت يسرى نصر الله البروفات وكان عندنا وقت طويل نتمرن على الفيلم
وعن التناقض فى الشخصية التى قدمتها فى الفيلم وظهورها بالحجاب وبدون فى يوم واحد قال منى زكى : فيه بنات كتير فى المجتمع لابسة الحجاب مضطرة ...محدش ينكر ده ، علشان انسانيتها لاتهان
**سألها معتز : هو المجتمع بيهين المرأة غير المحجبة ؟
ردت : بيهين المرأة عموماً المحجبة وغيرها ، والناس واخدين الدين من برة وناسيين ازاى ديننا بيحترم المرأة ولا انكر ان جزء كبيرمن اسباب ده المرأة نفسها ، لكن احنا فجأة بقينا بنرجع لورا ، عايزيننا نرجع نقعد فى كهف .

**قال معتز : فيه رسالة تقيلة وصلتلى بعد الفيلم ..ان مفيش رجالة فى البلد وانتوا قدمتوا نماذج كلها سيئة ..الوزير النصاب والولد اللى بيضحك على 3 بنات اخوات واللى بياخد مرتب مراته .....
ردت منى : تنكر كمية السيدات اللى بتعول اسرها والراجل قاعد فى البيت ؟ متحملة مسئولية بيت وحدها
رد معتز : انتوا ماخليتوش راجل عدل فى الفيلم .
- اكيد فيه ناس كويسة لكن الفيلم دراميا يحتمل هذه النماذج

**اشمعنى شهزاد وانتى اسمك هبة ؟
- شهر زاد رمز للمرأة اللى المفروض تستخدم عقلها

كان النجم احمد حلمى كعادته ساخراً وضاحكاً حتى من الشائعات التى تمس سمعة اسرته ، قال على الهاتف لمعتز الدمرداش : أنا مارحتش العرض الخاص بتاع فيلم منى زكى ، رحت عرض خاص صغير عزمنى عليه الاستاذ يسرى نصر الله علشان مكنتش عايز اظهر وسط الناس واحرق لوك الفيلم الجديد
ساله معتز عن رأيه فى الفيلم فقال : كنت مبسوط بيه جداً خاصة وان منى بقالها اكتر من سنتين ماعملتش حاجة، عجبنى المزج بين عالم يسري نصر الله وعالم وحيد حامد .
قال معتز : فيه اشاعات اتقالت ان الفيلم عمل بينكم مشكلة ؟
رد حلمى : مش الفيلم بس دايما فيه اشاعات و90% منها مش باعرفها الا من امى وحماتى !! السنة اللى فاتت مثلا اتقال اننا حجينا سوا وصحيح انها اشاعة كويسة ويارب نحج تانى لكن احنا حجينا من 3 سنين !!!
كان مرة ضرس منى واجعها وخدها وارم اتقال ان احمد حلمى ضرب منى على وشها !!
أضاف حلمى : نفسي الناس تركز فى شغلها وحتى لو المقابل قليل الاهم هو الاخلاص فيما تفعله والعائد ممكن ييجى من حته تانى خالص